أخبار عاجلة
الرئيسية / all / تربية الكلاب | يوم الولاده | الرضاعه | التطعيمات | غذاء الكلاب | مكان تربية الكلاب | تدريبات | البلوغ والحيض | الاهتمام بالكلبه الحامل

تربية الكلاب | يوم الولاده | الرضاعه | التطعيمات | غذاء الكلاب | مكان تربية الكلاب | تدريبات | البلوغ والحيض | الاهتمام بالكلبه الحامل

تربية الكلاب | يوم الولاده | الرضاعه | التطعيمات | غذاء الكلاب | مكان تربية الكلاب | تدريبات | البلوغ والحيض | الاهتمام بالكلبه الحامل

بقلم / وائل علام

تعتبر تربية الكلاب من القرارات المفرحة التي يفعلها أي شخص محب للحيوانات الأليفة وللكلاب بشكل خاص، حيث يأتي إلى المنزل فرد جديد من أفراد الأسرة يعطي الحب للآخرين دون قيود أو شروط. وعلى الرغم من أنها سوف تكون تجربة جديدة إيجابية وممتعة إلا أن الكلب يحتاج إلى الاهتمام والرعاية والدعم البدني والعاطفي.

خلاصة الكلام
عاوز تربى كلاب يبقى المنشور ده لازم تقرء
كل حرف فيه ولو عجبك الكلام اتفضل علق بدعوة حلوة وأعمل شير للبوست خلى كل الناس المحترمه تستفاد ذيك بلاش الكوبى لا أزعل منك وطبعا متابعتك صفحتى يسعدنى
وتشريفك جروب
سوق الجمعه للكلاب بالسيدة عائشه
السلام عليكم معلش الموضوع طويل شويه بس مهم جدا

🔔 #كل_ما_يخص_عمليه_التفريخ🔔

النقاط اللى هانتكلم فيها فى الموضوع :-
———————————————

1- البلوغ والحيض وسن الجواز عند الكلاب
2- كيف تتم عمليه الجواز
3- الاهتمام بالكلبه الحامل
4- يوم الولاده
5- الرضاعه الصناعيه (كيف-متى)
6- الاهتمام بالجراء حتى سن الفطام
7- التطعيمات
8- اكثر الشائعات فى موضوع الانتاج

———————————————————

مبدأيا كده فى الموضوع ده هنلاقى أراء كتير جدا وكل واحد ليه طريقه معينه فى الانتاج وطريقه الاهتمام والتغذيه والاهتمام بالجراوى

يعنى هنلاقى ناس بتسيب الكلبه تولد لوحدها
وناس بتبقى قاعد فى وقت الولاده وبتساعد الكلبه اللى بتولد فى رعايه الجراوى

وهنلاقى مثلا ناس بتأكل كلابها من سن 20 يوم
وناس تانيه بتأكل بعد 45 يوم

وناس بتدى الكلاب التطعيم فى سن 25 يوم
وناس تانيه تدى التطعيمات فى سن 45 يوم

وحاجات تانيه كتير

هنا هحاول أضم كل الطرق والمعلومات اللى ممكن تفيدنا فى موضوع الانتاج وهشرحها بطريقه مبسطه .

———————————————————————–

1- البلوغ والحيض وسن الجواز عند الكلاب :-
———————————————

سن البلوغ هو السن اللى بتكون فيه الكلاب اكتملت جنسيا وتقدر تتجوز وتنتج .
لكن لا يفضل الجواز للكلاب فى بداية سن البلوغ وده لاسباب كتير

1- بالنسبه للذكور عند الزواج فى سن مبكر ينمو بصورة ابطأ من الصورة الطبيعيه وده ممكن يخلى الكلب مايوصلش لحجه الطبيعى .

2- بالنسبه للإناث عند الزواج فهذا إجهاد شديد للكلبه لانها تكون فى سن مبكر للزواج والرحم لم يصل لنموه الطبيعى
وده ممكن يؤدى فى حالات لسقوط الحمل وتشوه الجراء بسبب حجم الرحم .

الموضوع بالظبط عامل زى الانسان سن البلوغ بيكون عن البنات فى عمر 12-13 سنه
لكن هل الحمل عند بنت 13 سنه هايكون بشكل صحى زى بنت فى سن 25 سنه .

س : ايه هو سن البلوغ عند الكلاب ؟

ج : سن البلوغ عند الذكور بيبدأ من 7 شهور إلى 10 شهور .
سن البلوغ عند الاناث بيبدأمن 6 شهور إلى 12 شهر .

س : طيب ايه السن اللى ممكن اجوز فيه الكلاب وانا مطمن ؟

ج : ممكن ابدأ اجوز وانا مطمن فى المواعيد دى : بالنسبه للذكور ممكن بداية من سن 15 شهر إلى سن 17 شهر .
بالنسبه للإناث ممكن بداية من سن 14 شهر وده فى الغالب بيوافق الحيضه التانيه عند الكلبه .

س : ايه معنى كلمه حيض ؟

ج : حيض = بيرويت = دورة الشبق
هو الوقت اللى بتكون فيه الكلبه مستعده وجاهزه للجواز .

س : اعرف ازاى طيب ان الكلبه فى وقت الحيض او عايزه تتجوز ؟

ج : طبعا حاجات كتير ممكن تعرفنى ان الكلبه عايزه تتجوز نبدأ بالاعراض الجسميه وهنلاحظها فى
انتفاخ الجهاز التناسلى للكلبه
لونه اصبح وردى محمر
وجود نقط دمويه لونها احمر ومع مرور الوقت تصبح ورديه إلى ان تختفى .

فيه كمان الاعراض النفسيه ودى بنلاحظها فى سلوك الكلبه

لو انت مربى ذكر مع انثى سهل انك تكتشف الحيض لانك هتلاقى الذكر بيمشى ورا الانثى ومش بيسبها وهتلاقيه معظم الوقت بيشم فى جهاز الكلبه ,
هتلاقى كمان الانثى موافقه على التصرف ده من الذكر وهتلاقيها بتلعب معاه بشكل هستيرى
وحتى لو هو مش مركز معاها هتلاقيها برضه بتحاول تلفت نظره بأى نوع من انواع اللعب .

نيجى للجزء اللى الكل بيحبه وهو

الخلاصه :
————

س : طيب لو مش عارف الحاجات دى وعايز اعرف الكلبه حايضه ولا لأ ؟
ج : لو مربى الكلبه فى الشقه هيكون سهل جدا انك تلاحظ تصرفات الكلبه وهتلاحظ الدم فى كل مكان هاتقعد فيه الكلبه
وخصوصا لو لو الارضيه فاتح فهيبان جدا .

س : طيب لو مش مربى الكلبه فى الشقه ومش معاها دكر او معاها دكر وملاحظتش اللى انا قلته من شويه ؟

ج : يبقى تبص على جهاز الكلبه كل يومين او تلاته بعنيك وتشوف فيه نقط دمويه ولا لأ

او الحل الامثل وهو انك تجيب منديل وتمسح بيه جهاز الكلبه وتشوف ايه اللى هايظهر على المنديل
ولو لاحظت انتفاخ جهاز الكلبه ومافيش اثار دم واضحه على المنديل
يستحسن انك تتأكد اكتر بأنك تدخل جزء بسيط من المنديل داخل جهاز الكلبه
وده لانه ممكن تكون الكلبه بتنضف جهازها التناسلى بلسانها وبكده مش هتلاحظ نقط الدم لانه بيتمسح بإستمرار .

ملحوظه :
———-

فى بعض الحالات النادره تأتى للكلاب حيض صامت وهو نفس الحيض الطبيعى لكن بدون نقط دمويه
وذلك يمكن ان يكتشفه المربيين الخبراء بسهوله , ويمكن ايضا ان نكتشفه عن طريق ملاحظة تصرفات الكلاب
اللى اتكلمنا عليها او انك تعرض الكلبه على دكر وتشوف الدكر هايتصرف ازاى .

س : ايه العوامل المؤثره على حيض الاناث ؟

ج : الفرق بين كلبه جالها الحيض فى سن مبكر وكلبه تانيه فى سن متأخر هو هرومونات الكلبه
والخلل فى الهرمونات ده ممكن يأخر فترة الحيض عند الكلاب ولكن لو الحيض اتأخر عن الميعاد الطبيعى
اللى انا كتبته فى سن البلوغ لازم نستشير دكتور بسرعه .

طيب احنا عرفنا ان الهرمونات هى اللى بتأثر فى وقت الحيض
س : طيب ايه العوامل المؤثره فى الهرمونات بقى ؟

ج : طبعا وبكل تأكيد الغذاء والرعايه الصحيه للكلبه وفى بعض الحالات بتكون عوامل وراثيه
وممكن طبعا بعد استشارة طبيب ندى للكلبه ادويه وهى عباره عن
فيتامينات وفسفور ومكملات غذائيه لتساعد فى رفع الخصوبه عند الاناث .

س : طيب امتى اجوز الكلبه ؟

ج : جواز الكلبه المفروض يكون بعد ظهور علامات الحيض بـ 10 ايام
يعنى من بعد اول يوم نزل فيه دم وظهرت اعراض الحيض احسب 10 ايام واجوز الكلبه .

—————————————————————————————-

2- كيف تتم عمليه التزاوج ؟ :-
——————————–

طريقة الجواز بتختلف من كلب للتانى فيه كلاب بتتجوز بسهوله وبدون مساعده

فيه كلاب محتاجه مساعده ممكن يكون بسبب :

1- ممكن يكون الكلب اول مره يتجوز وبيكون مش عارف يتجوز وهنا لازم محاوله الزواج بتكون مرهقه للذكر .

2- ممكن كلب يواجهه صعوبه فى الجواز بسبب مشكله فى مفاصل الرجل الخلفيه
وهنا لازم ارفع مستوى الكلب عن الكلبه يعنى احط اى حاجه تحط الدكر
بحيث يكون اطول من النتايه فيكون الضغط على مفاصل رجله اقل .

3- الكلبه اول مره تتجوز بتكون الجوازه مؤلمه بالنسبه ليها فمش بتسمح للكلب انه يتجوزها
وبتكون شرسه وبتهاجم الذكر اثناء الجواز وهنا لازم اساعد الدكر بأنى امسك النتايه جامد للدكر او البسها كمامه وبرضه بكون ماسكها .

س : طيب ازاى برضه اجوز الكلاب ؟

ج : هاقول على اكتر من طريقه وكل واحد يشغل دماغه ويشوف انهى طريقه افضل لكلبه ولكلبته :

1- هاتسيب الدكر والنتايه مع بعض فى اى مكان وتسيبهم يتعرفوا على بعض
ويلعبوا وبعد كده هتلاقى الذكر بيتجوز النتايه لوحده والنتايه هاتقف بدون حركه وهاتساعد الدكر .

2- فيه كلاب تانيه مش بتقف فهتضطر تمسك الكلبه وده بيكون بسبب التوتر او الزواج لاول مره .

3- فيه طريقه تانيه ودى كلها بتكون بمساعدتك انت وهى انك بتساعد الدكر انه يتجوز بسرعه
ودى مش اى حد بيعملها غير المتمرسين فى تربيه الكلاب كتير وهى
انك تثبت جهاز الكلبه بإيدك وتساعد الذكر وهو بيحاول يتجوز بإنك تحاول
تدخل العضو التناسلى بتاعه داخل جهاز الكلبه ودى الطريقه المفضله للتجار بسبب سرعتها وعدم انهاك الذكر .

4- اخر طريقه وهى التلقيح الصناعى والطريقه دى هى المفضله عندى ونتائجها مضمونه 100 %
لان الجوازه بتكون كلها بإيدك وبتكون انت ضامنها وهى بإنك بتجيب اى كيس معقم
وتحاول تخلى الكلب يفرز فيه الحيوانات المنويه من العضو التناسلى بتاعه
وده ممكن يكون عن طريق انك تجيبله نتايه فى فترة الحيض وتخليه يشم فيها
وده بيحفزه على إفراز السائل المنوى وده هايساعدك كتير طبعا وبعد الكلب ما يفرز الحيوانات المنويه
كده هايكون دوره خلص تماما , نيجى بقى للتلقيح هايكون كالاتى وهو انك هاتجيب سرنجه وتشيل منها السن
وتملاها بالماده اللى افرزها الذكر و هاتدخل السرنجه فى جهاز الكلبه وتفضيها مع اخذ احتياط
ان الماده ماتخرجش من الجهاز ولو أمكن للضمان بيكون فيه زى انبوب بلاستيك مطاط طويل شويه
وده بيتركب فى السرنجه وبيدخل فى جهاز الكلبه لضمان التلقيح وعدم خروج السائل المنوى من جهاز الكلبه .

ده شكل السرنجه والانبوب البلاستيك المطاط داخل جهاز الكلبه

س : امتى ممكن نستخدم التلقيح الصناعى ؟

ج :
ممكن نستخدمه طبعا فى اى وقت ولكن معظم الناس مش بتحبه لكن معظم حالات التلقيح الصناعى بتكون كالأتى

1- فى حالات إصابة الكلاب بأمراض العظام وعدم تمكنهم من إتمام عمليه الزواج بشكل مثالى .

2- ايضا يستخدم هذه الطريقه اصحاب انواع الكلاب الاتيه : البولدوغ – البج – البيكنواه – الاميريكان بولى
وذلك نظرا لقصر فمهم (البوز) وبيواجههم ضيق تنفس وده طبعا لاننا قلنا من شويه ان عمليه التزاوج مرهقه للذكر .

3- شراسه الكلاب القاتله والتى لايمكن السيطره عليها اثناء الزواج .

س : المفروض اجوز الكلبه كام مره وتفرق فى ايه ؟

ج : طبعا عدد الجوازات مالهوش علاقه بعدد الجراوى خالص انما هو علشان نتأكد ان عمليه التزاوج تمت بشكل سليم وبنجوز الكلبه مرتين او تلاته بالكتير للضمان مش اكتر بنجوز الكلبه يوم ونفوت يوم وهكذا لغاية 3 جوازات .

——————————————————-

3- الاهتمام بالكلبه الحامل :-
——————————–

الاهتمام بالكلبه الحامل بيكون طبيعى زى العادى بس مع مراعاة الاتى :

1- إعطاء اكل مغذى لانك بتغذى الكلبه والجراوى مع بعض مش مجرد اكل يملى المعده وخلاص .

2- عزل الكلبه الحامل فى اواخر فترة الحمل عن باقى الكلاب .

3- المشى مفيد للكلاب الحامل .

4- ممنوع عمل مجهود شاق مثل الجرى واللعب العنيف .

5- يمكن إعطاء الكلبه الحامل فيتامينات وكالسيوم وهذا لان الجراء تقوم بإمتصاص الكالسيوم من عظام الام
و الفيتامينات من جسمها وهذا مضر جدا فى حاله عدم توافر التغذيه المفيده .

6- توضع الكلبه للمكان المجهز للولاده قبل ميعاد الولاده بـ 7 ايام على الاقل حتى تعتاد على المكان .

7- ممنوع إعطاء الكلبه الحامل اى ادويه او مواد كيماوئيه مثل انبولات الحشرات
إلا إذا تأكدت انه امن للحوامل لان كلها ممكن تؤدى إلى إجهاض الكلبه .

8- ممنوع اعطاء ادوية الديدان او اعطاء التطعيمات للكلبه فى وقت الحمل

——————————————————————————————-

4- يوم الولاده :-
——————–

ناس كتير بتواجه مشاكل كتير بتقابلهم وبتكون مش عارفه تتصرف فى يوم الولاده ومعظم الناس بتكون قلقانه بخصوص اليوم ده .

طبعا الكلبه بعد حوالى 60 يوم من اول جوازه
وممكن تتأخر لغاية 70 يوم ومش اكتر ولو الكلبه اخدت وقت اكتر يبقى لازم زيارة المستشفى فى اسرع وقت
لإجراء عمليه ولاده قيصريه لان احتمال الجراوى تموت فى بطن الام وده هايؤدى بعدها لوفاة الام لو الجراوى فضلت فى بطنها .

س : طيب ايه اللى المفروض يكون متوفر قبل الولاده ؟

ج :
1- صندوق خشب علشان الكلبه تولد فيه
يكون على مقاس الكلبه والجراوى ومش كبير زياده عن اللزوم
علشان الكلبه تقدر تسيطر على الجراوى وتجمعهم وترضعهم بسهوله .

2- سجاده او نشارة خشب او قش رز
وده علشان الكلبه تولد عليه والحاجات دى هاتدى تدفئه للكلاب
وده غير انها هاتمتص السوائل اللى هاتنزل من الكلبه يوم الولاده .

3- لمبه 200 وات لتدفئة المكان المتواجد فيه الكلبه والجراء وتكون على ارتفاع لا يقل عن متر .
الغرض من اللمبه التدفئه فقط .
لا تضع اللمبه على ارتفاع اقل من ذلك حتى لا تموت الجراء من درجة الحراره العاليه .

4- حقنة طلق علشان لو الكلبه احتاجتها مش اكتر

دى حاجات لازم تكون موجوده فى المكان اللى هاتولد فيه الكلبه قبل الولاده

س : طيب ايه علامات الولاده ؟

ج : توتر شديد – الكلبه بتلف حوالين نفسها وفى كل مكان ومش عارفه تعمل ايه
– الانقطاع عن الاكل لمدة يومين او اكثر قبل الولاده – الكلبه بتنضف الجهاز بتاعها كتير بصرة غريبه

س : طيب ايه اللى المفروض اعمله اول لما الاقى الاعراض دى ؟

ج : طبعا فيه كلاب بتتصرف لوحدها وبتولد لوحدها بس احنا هنا هانتكلم عن الكلاب اللى محتاجه مساعده او اول مره تولد ,
هانقعد جنب الكلبه طبعا ونحاول نطمنها ونهديها لانها بتكون بتتألم بشده ,

ممنوع اعطاء الكلبه اى دواء او اى حاجه قبل نزول اول جرو للتأكد من انها حالة ولاده وليس إنذاء كاذب

مع نزول اول جرو بيكون معايا الاتى :
مقص معقم
جوانتى فى ايدى
خيط
فوطه ناشفه

طبعا الجرو بينزل فى كيس من بطن امه
هنلاقى الام استلمت الجرو وقعدت تلحس فيه وتنضفه وتقطع فى الكيس وتاكل الزيادات اللى نازله مع الجرو
ولو الموضوع اتأخر شويه او الكلبه ماعملتش كده لازم اتدخل بسرعه واخرج الجرو من الكيس وانشفه كويس جدا
من السوائل اللى عليه وطبعا هابدأ بالوجه واتأكد ان مافيش ميه فى انفه و هانقص الحبل السرى
اللى بيكون متوصل فى بطن الجرو بالمقص ولازم نسيب مسافه بعيد عن بطن الجرو مش نقص الحبل السرى من عند بطنه
وهنلاقى الحبل السرى بينزل دم وهنا هانستخدم الخيط ونربط بيه الحبل السرى علشان نوقف الدم اللى بينزل منه
وبعد التأكد من صحة الجرو وسلامته وتنشيفه كويس ابدأ احطه قدام امه علشان تطمن عليه وتكمل دورها
هنلاقيها بتلحس فيه وده كويس جدا لان الحركه دى بتنشط الدوره الدمويه عن الجرو الحديث الولاده وده كويس .

ولو لقينا الكلب حركته قليله هابتدى اعمله تدليك بسيط فى منطقة الصدر براحه جدا علشان انشط الدورة الدمويه .
اثناء الولاده ممكن ندى الكلبه بيض مسلوق وده لانه بيزود الطلق عند الكلبه اللى بتولد ويخليها تنزل الجراوى بشكل احسن .

وهكذا لغاية لما تتم عملية الولاده بنجاح .

س : (مهم جدا) ايه المشاكل اللى ممكن تقابلنى فى الولاده ؟

ج :

1- الكلبه نزلت جرو ومش راضيه تنزل جرو تانى

الحل : اقصى وقت ممكن الكلبه تاخده بين نزول الجراوى هو ساعتين بس لو الكلبه اخدت وقت حوالى ساعه ونص هنبدأ ندى حقنه الطلق
حقنه الطلق اسمها (سينتوسينون – Syntocinon)
طبعا بتتخفف 1سم من الحقنه على 9سم مياه
وده لان تركيزها عالى
الجرعه بتكون حسب نوع الكلاب ووزنها يعنى الكلاب الجريفون مش هاتبقى زى الجيرمن او الروت
بس بتكون مابين 1سم إلى 3سم وهتلاقى الجرو نزل بعدها بحوالى 5-10 دقائق
لو الجرو اتأخر تانى ممكن نزود الجرعه شويه يعنى لو بدى 1سم هزودها لـ 3سم .

لو اديت حقنه طلق ومافيش فايده برضه يبقى لازم تروح للمستشفى احسن ودى بتكون حالات نادره شويه .

2- الكلبه شرسه ومش راضيه تخلينى ادخل عندها او المس الجراوى

الحل : طبعا الشراسه دى بتكون فطريه حتى لو كلبتك من النوع الهادى جدا ممكن جدا يوم الولاده تلاقى الكلبه اتحولت
هتلاحظ الكلبه من بعيد وتشوفها هاتتصرف إزاى ولو احتاجت تدخل يبقى لازم تحاول تمسك الكلبه
او تحاول تبعدها عن الجراوى او المكان اللى فيه الجراوى وهتلاقى الكلبه هديت شويه
ونلبسها كمامه علشان نبقى متأكدين اننا مش هانتعرض للعض وندخل معاها تانى عند الجراوى
ونتعامل بحذر وبهدوء مع الجراوى لغاية لما الام تطمن انك بتساعدها ومش هاتئذى اولادها .

3- الكلبه بتاكل الجراوى

الحل : من الطبيعى انك تلاقى الكلبه بتاكل جرو نازل من بطنها ميت مثلا , لكن اللى مش طبيعى انها تبقى بتاكل جرو عايش
وهنا لازم تتخد وتلبسها كمامه و تربطها بعيد عن الصندوق اللى الكلبه بتولد فيه واللى بيكون فيه الجراوى ووقت الولاده
هاتمسك الجراوى وترضعهم بنفسك من صدر الام وتلاحظ تصرفاتها لو لسه ممكن تاكلهم هاتربطها تانى بعد الرضاعه
وهكذا والموضوع هايكون متعب طبعا , لكن لو لاحظت انها رجعت لطبيعتها واهتمت بالجراوى ممكن تسيبها مع الجراوى عادى .

4- مش عارف الكلبه فى بطنها جراوى تانى ولا خلصت ولاده

الحل : الموضوع هايكون بالنظر يعنى هانلاحظ الموضوع على بطن الكلبه هنلاقيها فضيت تماما
ورجعت للحجم الطبيعى وطبعا الكلبه هاترجع لحالتها الطبيعيه وتهدى شويه , طيب اتأكد ازاى ؟

احنا قولنا ان الكلبه لما بتقعد ساعه ونص ماتنزلش جرو بنديها 1سم من حقنه الطلق اللى مجهزينها ولو مانزلتش جرو برضه بنزود الجرعه ,
هنلاقى بعد حقنه الطلق الكلبه بتطلع كل السوائل الباقيه فى الرحم وهنا هاتعرف انها بتفضى الرحم ومافيش جراوى تانى ,
لو الكلبه نزلت كل السوائل دى بدون حقنة طلق يبقى مالهاش لازمه الحقنه لان الغرض من الحقنه اننا نتأكد .

5- الكلبه مش بتأكل الجراوى ومش راضيه تهتم بيهم (حاله نادره)

الحل : الموضوع ده بيحصل فى حالتين :

الاولى : ان فيه جراوى بتنزل تعبانه من بطن امها والام سبحان الله بتكون عارفه ان الجرو ده هايموت فمش بتهتم بيه .

التانيه : الام مش راضيه ترضع الجراوى الطبيعيه هانضطر هنا نرضع رضاعه صناعيه .

6- لبن الام فيه صديد

طبعا بعد الولاده بنضف صدر الكلبه كويس بفوطه مبلوله ونختبر اللبن فى كل حلمه علشان نشوف لو فيه صديد ولا لأ .

الحل : اولا لازم نفرق بين لبن السرسوب والصديد فى صدر الام
السرسوب هو لبن الام اللى بيكون فى بدايه الولاده وبيكون لونه مصفر شويه وده طبيعى ومالهوش اى خطر بل بالعكس ده مفيد جدا .

طيب الصديد : بيكون اللبن لونه مخضر شويه واللبن لزج زياده عن اللزوم وهنا لازم نعزل الجراوى ونبدأ نرضها رضاعه صناعيه .

س : علاج الصديد ايه ؟
ج : الصديد طبعا هو عباره عن بكتيريا فى لبن الام فهندى مضادات حيويه زى اوجمنتين وطبعا الجرعه بتكون حسب النوع والحجم .

7- كلبتى ولدت ولاده قيصريه

الحل : طبعا فى الولاده القيصريه الكلبه ما هاتقدر ترضع الجراوى
فهنضطر نرضع رضاعه صناعيه .

8- الجراوى بتموت لوحدها ومش عارف اعمل ايه

الحل : طبعا ممكن جراوى تكون نازله تعبانه وتموت لكن انا بتكلم على الحالات التانيه زى :
لبن الام قليل وممكن يكون السبب عدد الجراوى – صديد فى اللبن – درجة حراره عاليه جدا او منخفضه جدا .

————————————————————————————————-

5- الرضاعه والرضاعه الصناعيه (كيف-متى) :-
————————————————-

طبعا فى الطبيعى الكلبه لما بتخلص ولاده بنبتدى نرضع الجراوى من صدر امها ونساعدها فى تنظيم الرضاعه .

فيه امهات بترضع الجراوى لوحدها بس لازم اكون متابع وملاحظ الجراوى لان ممكن مع تدافع الجراوى
على صدر امهم يكون فيه جرو مارضعش رضاعه كافيه وهنلاقى جسمه بقى فى حاله ضعف وممكن يموت ,
علشان كده لازم نشرف على عمليه الرضاعه .

– الرضاعه بتكون كل ساعتين –

هابتدى امسك كل جرو واخليه يمسك فى صدر امه لغاية لما يشبع .

س : اعرف منين ان الجرو شبع ؟
ج : هنلاقى الجرو مش راضى يمسك فى صدر امه حتى لو مسكته وحاولت ترضع بالعافيه .

طبعا لو عدد الجراوى كبير يفضل انك تدخل الرضاعه الصناعيه فى الموضوع
علشان نساعد الام وهاتخلى الجراوى ترضع مرتين او تلاته فى اليوم رضاعه صناعيه .

طبعا احسن لبن للجراوى هو لبن الام علشان مافيش حد يرضع الجراوى رضاعه صناعيه بس ويقول انها اسهل ,
إلا إذا كان فيه حالات طارئه تستدعى الرضاعه الصناعيه .

الحالات التى يجب تدخل الرضاعه الصناعيه فيها :
————————————————–

1- الام بتاكل اولادها : يبقى لازم نساعد الجراوى برضاعه صناعيه .

2- ولاده قيصريه : الام مش هاتقدر ترضع الجراء يبقى لازم نرضع الجراوى رضاعه صناعيه .

3- لبن الام قليل : وده هنلاحظه بأن الجراوى حجمها بيقل وبتخس وهنا لازم اعوض الجراوى بلبن صناعى .
الحل : لزيادة لبن الام : مياه كتير – اكل مغذى يحتوى على كالسيوم – يمكن اعطاء زيت حلبه او مشروب علبه عادى – عسل اسود .

4- صديد فى لبن الام : الصديد هو بكتيريا فى لبن الام وده بيؤدى لوفاة الجراوى ولازم هنا نعزل الجراوى عن الام ونرضعم صناعى .

5- عدد الجراوى كبير اكتر من 10 جراوى : طبعا لازم نساعد الام برضاعه صناعيه لان عدد الكلاب هايكون كبير وهايكون إجهاد على الام .

ايه هى بقى الرضاعه الصناعيه :-
——————————-

هانجيب لبن مخصص للجرواى وده فى منه انواع كتير واحسنهم واغلاهم الرويال كانين او ممكن نجيب لبن بشرى للاطفال الرضع او فيه لبن اسمه لبن ماعز وهانجيب ببرونه ونبدأنرضع الجراوى .
محدش ينسى الغرض من الرضاعه الصناعيه مساعدة الام .

ممنوع بتاتا استخدام لبن عادى لانه خطر جدا وصعب هضمه لانها بيحتوى على ماده تسمى اللاكتوز ودى بتكون تقليه على معده الجرو وممكن تؤدى للوفاه .

الرضاعه بتكون بإستخدام ببرونه اطفال اصغر مقاس

——————————————————-

6- الاهتمام بالجراء حتى سن الفطام :-
——————————————

بعد عمليه الولاده لازم طبعا نهتم بالام والجراوى كويس
لازم ندى الام بعد الولاده سوائل كتير علشان تعوض السوائل اللى فقدتها اثناء الولاده .

نهتم بالتغذيه كويس جدا لان فى فترة الرضاعه
الجراوى بتسحب الكالسيوم اللى فى جسم الام عن طريق اللبن
وطبعا لو الكالسيوم اللى فى جسم الام خلص هايبتدى يتسحب من العظم ودى بتكون حاله خطيره .

اتكلمنا عن الرضاعه انها بتكون كل ساعتين وممكن نساعد برضاعه صناعيه لو احتجناها .

كله يركز فى الجزء اللى جاى بقى

كل اللى فات هنلاقى كل الناس بتتفق عليه والاسلوب والطريقه واحده لكن اللى جاى هنلاقى ان كل واحد وليه طريقه .

انا النهارده جايبلكم طريقتين للإهتمام بالجراوى والطريقتين صح و ناس كتير بتتعامل بيهم بس كل واحد بيفضل حاجه

1- الطريقه الاولى :-
———————-

سن الفطام الجراوى : 20 يوم .
التطعيمات : اول جرعه ثنائى عند سن 30 يوم والتانيه خماسى او ثمانى عند سن 45 يوم .

بنبدأ ناكل الجراوى عند سن 20 يوم طبعا الفطام مش معناه انى امنع الرضاعه .
احنا هاندخل الاكل البسيط مع الرضاعه
هانبدأ ندى الجراوى اول وجبه وهى هاتكون عباره عن سيريلاك رز .
هاندى وجبتين اكل فى اليوم والباقى رضاعه .
بعد كده هانبدأ ندخل الدراى فود (الاكل الجاف المخصص للجراوى) على السيريلاك بعد سن 25 يوم او ادخل الزبادى .
وازود عدد الوجبات مثلا لـ 3-4 وجبات مع الرضاعه .
ممكن بعد 30 يوم ادخل لحوم دواجن بنسب بسيطه وممكن ازود رز .

2- الطريقه التانيه :-
————————

سن الفطام الجراوى : 35 يوم .
التطعيمات : اول جرعه ثنائى عند سن 30 يوم والتانيه خماسى او ثمانى عند سن 45 يوم .

بنبدأ ناكل الجراوى عند سن 30 يوم بعد التطعيم بـ 5 ايام وده لان معدة الجراوى ممكن تصاب ببكتيريا من خلال الاكل .
فيفضل بعض الناس انها تخلى الاكل بعد التطعيم علشان الجراوى تبقى متحصنه ضد البكتيريا .

طبعا فيه ناس تقول ان الطريقه التانيه احسن من الاولى علشان البكتيريا والامراض لكن الطريقتين صح بس الطريقه التانيه الناس اللى بتستخدمها بتكون بتاخد كل الاحتطياطاط اللازمه لان الكلاب موجوده فى بيئه ملوثه او الاكل غير معلوم مصدره .

هانبدأ ندى الجراوى اول وجبه وهى هاتكون عباره عن سيريلاك رز .
هاندى وجبتين اكل فى اليوم والباقى رضاعه .
بعد كده هانبدأ ندخل الدراى فود (الاكل الجاف المخصص للجراوى) على السيريلاك .
وازود عدد الوجبات مثلا لـ 3-4 وجبات مع الرضاعه .
ممكن ادخل لحوم دواجن بنسب بسيطه وممكن ازود رز .

ممكن فى الطريقتين بعد 40 يوم ممكن تدخل انواع مختلفه من الاكل تحتوى على كالسيوم وفيتامينات وبروتين
كالسيوم : زبادى – جبنه بيضه بدون ملح – بيض مسلوق – دراى فود
بروتين : زبادى – لحمه حمرا مسلوقه – دواجن مسلوقه
فيتامينات ونشويات : عيش بلدى – ارز مسلوق – بطاطس مسلوقه – جزر مسلوق – كوسه – بسله – فاصوليا

——————————————————————————————————

كده خلصنا الطريقتين .

نيجى بقى لاهم جزء فى الموضوع

—————————————————–

معلومات وإشاعات حول موضوع الانتاج :-
——————————————

هحاول الخص كل اللى قلناه علشان نبقى فاكرين

1- نجوز الكلبه فى الحيضه التانيه علشان تكون اكتملت النمو

2- نجوز الدكر بعد 18 شهور علشان يكون اكتمل النمو

3- الحيض : جهاز منتفخ لون وردى ونقط دم

4- الحيض الصامت بدون دم

5- التزواج بيكون بأكتر من طريقه اهم حاجه نشوف انهى واحده اللى هاتناسبنا

6- اهتم بتغذية الكلبه الحامل واديها كالسيوم كتير

7- اعزل الكلبه قبل الولاده بأسبوع علشان تاخد على المكان

8- ممنوع المجهود للكلاب الحوامل

9- بوكس مخصص للولاده ولمبه للتدفئه

10- علامات الحمل : انتفاخ البطن – كبر حجم صدى الكلبه

11- علامات الحمل الكاذب : انتفاخ البطن – فتره اطول من فترة الحمل الطبيعى بدون اى علامات ولاده

12- للتأكد من الحمل يمكن عمل سونار فى المستشفيات البيطريه

13- الكلبه شهيتها بتقل وممكن تنقطع عن الاكل قبل الولاده بيومين او اكتر

14- يوم الولاده لازم تلاحظ تصرف الام كويس

15- حاول تهدى الكلبه وتساعدها وافتكر انها فى قمة الالم فى الولاده

16- فوطه ناشفه علشان تنضف الجرو

17- اربط الحبل السرى بخيط علشان ماينزلش نزل

18- بكون مجهز حقنة طلق ولبن صناعى علشان لو احتجتهم

19- انضف صدر الكلبه كويس واختبر الحلمات علشان لو اللبن فيه صديد

20- ادى للكلبه حلبه حصى او زيت حلبه او عسل اسود لزيادة اللبن

21- اهتم بتغذية الكلبه بعد الولاه علشان نقص الكالسيوم وممكن تدى ادوية كالسيوم او فيتامينات لتقوية المناعه ودى بيستفاد منها الكلبه والجراوى عن طريق الرضاعه (مالتى سنستول كالسيوم – ايمولانت)

22- الرضاعه كل ساعتين

23- لو قابلتك مشكله من مشاكل الرضاعه ممكن لو عندك كلبه تانيه والده تحط الجراوى دى مع اولادها بس تساعد برضاعه صناعيه طبعا

24- طريقتين للعناية بالجراوى

25- التطعيمات فى سن 30 يوم

26- ادويه الديدان فى للجرو فى عمر 15 يوم وتكرر الجرعه بعدها بـ15ــ يوم

27- اول ما الكلبه تحيض جوزها حتى لو تعبانه علشان ممكن ماتلحقش تجوزها وتسكب .

طبعا غلط لانه لازم تكون صحة النتايه ممتازه وقت الجواز ونفس الكلام بالنسبه للدكر , يعنى الدكر لو تعبان ماينفعش يتجوز .

28- جوز الكلبه من اول حيضه علشان بطنها توسع مع الحمل وتشيل كتير .

طبعا غلط لاننا قلنا ان حجم الرحم بيكون لسه ماخدش ماخدش حجمه الطبيعى وده ممكن يموت الجراوى جواه

29- ممكن الدكر يتجوز اكتر من مره فى اليوم .

طبعا الكلام ده غلط
لان كل ده استهلاك لطاقة الكلب وكل ده بيؤدى لضعف الكلب يفضل الجواز كل يوم ويوم

30- سيب الكلبه تولد لوحدها واوعى تدخل عليها علشان ماتخفش وتاكل جراويها .

طبعا احنا اتكلمنا عليها قبل كده وقولنا كل كلبه وليها الحاله بتاعتها وازاى نتعامل معاها

31- ماتديش الكلبه اى ادويه كالسيوم فى الحمل علشان
الجراوى حجمها بيكبر وبيضغطوا على بعض جوه الرحم وفيه كلاب بتنزل ميه .

الكالسيوم او ادوية الفيتامينات كلها مالهاش اى علاقه بحجم الجراوى لكن ليه علاقه بصحة الجراوى

32- ممنوع استحمام الجراء , نضافة الجراوى بتكون عباره عن فوطه مبلوله بميه دافيه وتمسح بيها الجرو

33- الاستحمام يمكن ان يؤدى إلى إلتهاب رئوى او نزله شعبيه

34- صحة الجراء تعتمد على اعتناء الام والرضاعه والتغذيه السليمه

35- التطعيم يجب ان يكون فى سن 45 يوم حيث تكتسب الجراء مناعه طبيعيه بعد الولاده حتى سن 45 يوم
ولكن الاغلبيه يفضل اعطاء التطعيمات فى سن مبكر حتى لا يكونوا عرضه للامراض

36- تانى جرعه من التطعيم بتكون مهمه جدا زى الجرعه الاولى بالظبط

37- اول جرو بينزل من بطن امه بيكون اقوى جرو وافضلهم .

طبعا الموضوع مالهوش اى علاقه خالص بأول او اخر جرو
اول جرو بينزل من بطن امه هو اقرب جرو لفتحة النزول

38- ممنوع اختلاط الجراء المطعمه مع جراء اخرى غير مطعمه

التطعيم هو عباره عن فيروسات مضعفه (ضعيفه) تعطى لتجعل جهاز المناعه يصنع اجسام مضاده لها واذا اختط الجرو الغير مطعم بجرو مطعم سوف يصاب بهذه الفيروس ويمكن ان تؤدى للوفاه

39- تزويج الكلبه اكثر من مره ينتج عدد جراء اكثر

معلومه خاطئه حيث ان اللى بيتحكم فى عدد الجراء هى الانثى وليس الدكر ,
عدد الجراء هو عدد البويضات التى كانت جاهزه للتلقيح وتم تلقيحها وليس اكثر انما عدد الزواج هو فقط للتأكد من عمليه التزاوج .

40- يجب متابعة الجراء جيدا وقت الاكل لنرى هل هناك اى اعراض تعب على اى جرو او حاله فقدان شهيه

41- عند اكتشاف اى حاله اسهال او قئ او خمول يجب استشارة الطبيب فورا لاخذ الدواء اللازم قبل الدخول إلى مراحل متقدمه خطيره فى المرض .

42- عند تطيعم الكلاب يجب التأكد بأن درجة حرارة الجرو طبيعيه (من 38-39 درجه) وعدم وجود اى حاله من حالات الاسهال او القئ او الخمول .

43- ممنوع اعطاء الجراء فى حالات التعب وفقدان الشهيه الجلوكوز حيث انه ينشط البكتيريا ويمكن ان نعطى محلول ملح ومحلول معالجة الجفاف .

44- ممنوع اعطاء الكلاب هذه الاكلات : العظام – الموا الكحوليه – الخميره والعجين – الكافيين – الشيكولاته – الثوم والبصل – الزبيب والعنب – المكسرات – السمك بكميات كبيره

45- يمنع تماما قص اذن او ذيول الكلاب إلا للحالات الطارئه ولكن ليس لهدف التجميل .

Rating: 5.0/5. From 1 vote.
Please wait...

عن محمد علام

" بكالوريوس إعلام " مراسل جريدة الدستور بالبحيرة - ومنسق ائتلاف شباب الصحفيين - وقل ربي زدني علما

شاهد أيضاً

منقاش - للعطارة - مكسرات -قهوة ومشروبات-بهارات -زيوت طبيعية

منقاش – للعطارة والمكسرات والقهوة و المشروبات والبهارات والزيوت الطبيعية – متجر منقاش

  منقاش – للعطارة والمكسرات والقهوة و المشروبات والبهارات والزيوت الطبيعية – متجر منقاش – …